Sulmuesi Arkadiusz Milik ka bërë një hap shumë të rëndësishëm në rikthimin e tij të gjatë nga lëndimi, pasi të martën është rikthyer në stërvitje të plotë me grupin e parë të Juventusit në qendrën stërvitore Continassa, pas plot 550 ditësh jashtë fushave.

Sulmuesi polak ka kaluar një periudhë jashtëzakonisht të vështirë për shkak të problemeve serioze fizike, që e kanë mbajtur larg futbollit për një kohë shumë të gjatë. Për këtë arsye, rikthimi i tij në stërvitje me ekipin përfaqëson një moment të shumëpritur brenda klubit bardhezi.

Prania e Milikut në seancat stërvitore me grupin ka sjellë optimizëm të ri te Juventusi, sidomos në një moment kur skuadra ka vuajtur mungesën e alternativave në repartin ofensiv gjatë sezonit.

Edhe pse ai ende ka nevojë për kohë për të rikthyer formën dhe ritmin e ndeshjeve, kthimi i tij konsiderohet një shtysë e madhe psikologjike, si për vetë lojtarin ashtu edhe për pjesën tjetër të skuadrës.

Tek Juventusi shpresojnë që Milik, pas një procesi të kujdesshëm rikthimi, të mund të japë kontributin e tij në fazën e dytë të sezonit, duke shtuar konkurrencën dhe zgjidhjet në sulm.

Milik kishte këputur ligamentin kryesor të gjurit në qershorin e vitit 2024 dhe që atëherë ka pësuar lëndime të njëpasnjëshme./Telegrafi/